OLD FLAME...

Zuk leh hmuam timi tan chuan zanriah eikham hlima chiseh lama chhuahvah hi thil thar a ni lo, puanthuahkhai hunlai atanga belrawh mualkîla chhangchhiat tawh hnu thlengin he 'zan vah hri' hian min la umzui zel a, sim a awm tak tak thei lo a ni ber e. Thlasik khawvawt zual a reh a, thâl romei zâm karah nipui khawlum uap churh maiin min la bawhbuai chiah lo bawk nen, thimhlim boruak a nuam hle.

Chutia mahni In lum chhuahsana hmanhmawh lem lova ka teikualnaah chuan a ni, hmâna ka lungdi, a hunlaia 'a ber' emaw ka lo tih ve thin, a bula ka awma kim ve em ema ka inngaih thinna leh lungchim taka tudang ngai lova duhthu ka lo sampui ve thin ngei kha ka tawng hlawl mai a. Engvanga lo teichhuak ve ngawt nge a nih leh tuna a dinhmun, pawmlai nei a ni tawh nge, lenglai a la ni tih pawh ka hre lova, hriat tuma han inzawh dîlchhût pawh a awm ta hek lo. Amaherawhchu, hai rual lohvin a mitmeng leh chezia atang chuan 'meisi' a la nung tih chu ka hmu-in ka hre thung. Ka rilru leh ka thinlung hian phalsak ni se, thiantha inchibai satliah aia rei hlek invawnzui mai pawhin a nunah 'meipui' a chhepnung leh thei ang tih pawh ka ringhlel hek lo.

Tuantûl vanga tlang danga ka kalsan dawn zana inthlahna atana "Love me like there's no tomorrow..." kan tih dun laia a mitmeng te, Krismas chawlha ka haw ve tuma kan inhmuh hmasak zana "Together Again" kan ngaihthlak dun laia duh em em hmelpu-a min melh lai hmel te, thian suakin kan kara hêm a thlaka ani tleirawl rilru sosangin ralkhata kan inkar a tihtawp hnu, dawtthu leng mai a ni tih a hriat leh si laia a hrehawm ti hmel te leh tawngka pawha sawichhuak ngam tawh lova lehkhathema "You are still number one" ti-a a kutziak ngei mai min hlan laia a mitmeng te kha reilo te kan inhmuh zawk chhung khan ka hmu nawn leh uai uai asin.

Ni e, engkim tan hun ruat a awm angin a hunlai kha chuan ka tan khawvel laibu kawltu a ni ve thin a, a sirah ka nun pumpui hi a virvel ni khan ka hre thin; a nuihin ka hlim a, a lungngaihin ka tap thin. Chu chu Hmangaihna emaw tiin phengphehlepin pangparzu a dawt angin ka phak tawkin ka lo dawt ve thin asin, bawihte...

MAHSE...

Hunin kum tam a liampui a, harsatna-in nun laimu min zirtir a; hmangaihna ni ngeia kan lo hriat, ka lo kurpui ve thin chu fiahin a awm a, a tling ta lo; a kin ta a, kha nunhlui, a hunlaia ka ngaihhlut ve thin kha puan hlui anga hlipin inbel nawn a rem tawh lo, a theih tawh loh.

Zing ni chhuak hlim ang maiin ka nunah êng mawi tak i lo chhuah a, lo thanglian zelin chu êng chu 'Hmangaihna tluantling'-ah kan châwm seilian dun a, kan pahnihin hlim takin kan chên ta a nih kha tiraw', bawihte...!!! I bulah chuan ka hlim a, ka thla a muang a, ka famkim thin asin, i hriat kha. I tel lova 'pan hnai la, thoh tur ut ut ang mai' ni thin kha i bulah chuan ka dam siai siai thin a, ruh chuktuah inrem taka a insi dam thlep ang mai hian i kiangah chuan ka hah a dam thin ka tih fo kha. I bulah hringnun "A, Aw, B..." a takin, a tharin ka zir tha leh a, hmangaihna hi inrintawnna leh inpektawnna hmanga chawm len tur a ni tih te, inngaihvarungthâwn satliah hi hmangaihna a nih lohzia te a ka hre nawn ve leh a. Chhimbal zam tel kher lova ruah a sur theihzia te, ruahsur leh khawdur hian hmabak khaw thiang leh ni êng min tiam a ni tih te leh ni sat rengna hmun chu thlaler mai a nihzia te i nun hian min zirtir thin. Ka tan tha thlah hauh lovin chhunah chhumding nih leh zana mei êng nih i hreh ngai lova, ka tlinlohnaah min zahpui lovin ka hlawhtlinnaah min chawisang thiam a, i bulah chuan mi chhuanawm leh mi ropui emaw ka inti mai thin a nih hi. Min hmangaihna hi kei mimawl pawhin hai rual lohva a taka ka hmuh thin avangin min bâwlzân ka ti phal lova, ka tih theih chhun chu ka theihna zawng zawng nena nang hmangaih let ve che hi a ni. Ka hmangaih che a, ka hmangaih reng tawh bawk ang che, ka tan chuan nang hmangaih loh che hi 'sual' a ni tlat. Ka nuna thu i sawi thukzia leh ka duhzia che hi min hriatnawnsak fo la ka duh, ka chak- lohnaa ngaiin min thuhnuai leh min hnualsuat phah nan hmansual i tum hauh lovang tih ka hriatchian ngam avangin.

Chaklohna phuarvel mihring nunah chuan nunhlui dâwnkîra zankhaw taireka inngaihtuah lungpuam changte chu a awm ngai nameuh mai. 'D-hlui'-te nena kan phak tawka thla eng hnuai leh eng lem lo hnuaia duhthu kan lo sam ve thin hunlai te, chatuan hawlh tur ang riaka ngaia ruahmanna leh beiseina hrui kan lo kham ve hunlai te pawh kha, hun leh kum hian liampui tawh mah se tum lawk vang pawh ni lem lova hriatrengna-in min hrilh nawn chang a awm ve thin ngei alawm, ka pha lo. Mahse, hetiang hunah tak hian asin ka tan i lo hlut lehzual a, ka nunah hian hmangaih thang i lo chhuah thin ni. Nangmah, nang chauh hian ka thinlung chhungrila hmun ruak chu i luahkhat thei a, ka nun khawhar hi zing daifimin i chawm famkim thei tih ka hrechiang nawn leh thin si a. Ka kiangah i awm a, i hmangaihna-in englai pawhin min uap reng a ni tih hriatna hian ka nunah thlamuanna min pe a, thinlung chhungrilah hlimna min hnutchhiah tlat thin; hei hi tu dang tihtheih mah a ni lo, nang chauh lo chuan. Hemi avang hian Siamtu hian kan tana ruat bik a nei a nih te hi ka ring lehzual thin a, ka tana i hlutna a tharin ka hre nawn leh thin asin. Nunhlui liam hnu chu ka tan hnâwmhne a lo chang zo va, i hmangaihna hian ka nung, ka awm leh ka chevel hi khawi kipah min uap avangin 'nunhlui' ti-a ka lo hriat ve thinte pawh zing arkhuangin mumang a hnawtbo thin ang leh, khawvar hnu-a arsite'n eng an chhuah ngam lo ang mai hian kan inhmangaihna tâwnah chuan an thamral ta si a.

Hmangaihna hi thil nung a ni a, chawmlen leh chhawmnun reng ngai, enkawl loh chuan thi mai thei leh liam mai thei a ni kan tih dun thin kha. Mi hran, pian leh murna hrang, seilenna thuhmun lo kan nih avangin kan karah thu inhmu lo zeuh zeuh pawh awm thin tura pawmdûn tawh kan nih kha; kan inremlohna tlang hriam leh titoh zawng zawng chu hmangaihna hian charphui zel ila, ni tin hmangaihna zirlai thar inzirtir a, hlimna leh lawmna karah nui dunin, harsatna leh hrehawmna pawh kan karah hêm thlaktu ni lovin min suihnghettu ni se... kan tih thin kha, bawihte...

Nunhlui liam hnu hian kan kara hmangaihna meichher a timit ngai lovang...